COVID-⁠19 Svizra

La preschentaziun mussa la chargia virala relativa en pertschient en la media da 7 dis en las sereneras (ARAs), e plinavant la differenza da la chargia virala envers l'emna precedenta en puncts procentuals (pp) en Svizra ed en il Liechtenstein. L'indicaziun en puncts procentuals vegn duvrada per cumparegliar las procentualas. La quota relativa per 7 dis sa referescha a la valur maximala istorica mesirada per mintga serenera.

Las datas publitgadas qua sa basan sin infurmaziuns dal monitoring naziunal da l'aua persa da la Confederaziun. Dapi il schaner 2022 registrescha il monitoring naziunal da l'aua persa da la Svizra e dal Principadi da Liechtenstein en intervals regulars la chargia virala da SARS-⁠CoV-⁠2 en l'aua persa da 99 sereneras (ARAs).

Las provas da l'aua persa en las sereneras vegnan prendidas trais fin sis giadas per emna. La chargia virala absoluta (copias geneticas/di) vegn inditgada per 100 000 abitantas ed abitants.In factur da rarificaziun sin basa dal volumen da deflussiun da la serenera vegn resguardà, per exempel en cas da periodas da sitgira. La chargia virala relativa è la cumpart da la chargia virala mesirada (copias geneticas/liter) en relaziun cun la valur maximala istorica mesirada. La cumpart da la chargia virala relativa vegn calculada cun divider la cumpart da la chargia virala absoluta tras la cumpart da la valur maximala istorica da la chargia virala. La populaziun vegn registrada en l'intschess respectiv da la serenera (ARA).

Infurmaziuns detagliadas davart la metoda da mesiraziun e davart la terminologia stattan a disposiziun sin la pagina d'internet da Eawag. Novas enconuschientschas scientificas pon effectuar che la calculaziun da las datas vegn adattada.