COVID-⁠19 Svizra

La grafica mussa la chargia virala absoluta e relativa en pertschient en la media da 7 dis en las sereneras, e plinavant la differenza da la media da 7 dis envers l'emna precedenta en puncts procentuals (pp) en Svizra ed en il Liechtenstein. La quota relativa per 7 dis sa referescha a la valur maximala istorica mesirada per mintga serenera. Las lingias verticalas represchentan adattaziuns da la metoda (incl. midada dal labor d'analisa). Las surfatschas schraffadas represchentan puncts da datas sut la limita da quantificaziun (limit of quantification = LoQ).

Las datas publitgadas qua sa basan sin infurmaziuns dal monitoring naziunal da l'aua persa da la Confederaziun. Dapi il schaner 2022 registrescha il monitoring naziunal da l'aua persa da la Svizra e dal Liechtenstein en intervals regulars la chargia virala da SARS-⁠CoV-⁠2 en l'aua persa da las sereneras participadas.

Fin il zercladur 2023 èn las provas da l'aua persa vegnidas prendidas trais fin sis giadas per emna, tut tenor la serenera. Dapi lura vegnan las provas prendidas en tut las sereneras tschintg giadas per emna. La chargia virala absoluta (copias geneticas/di) vegn inditgada per 100 000 abitantas ed abitants. In factur da rarificaziun sin basa dal volumen da deflussiun da la serenera vegn resguardà, per exempel en cas da periodas da sitgira. La chargia virala relativa è la cumpart da la chargia virala mesirada (copias geneticas/di) en relaziun cun la valur maximala istorica mesirada. La cumpart da la chargia virala relativa vegn calculada cun divider la cumpart da la chargia virala absoluta tras la cumpart da la valur maximala istorica da la chargia virala. La populaziun vegn eruida en l'intschess respectiv da la serenera. Las variaziuns stagiunalas da la populaziun betg permanenta che influenzeschan la chargia virala oravant tut en ils territoris turistics frequentads fermamain, na vegnan betg resguardadas. Las sereneras che na sa participeschan betg pli al monitoring, na vegnan betg resguardadas tar la calculaziun da la cumpart da la chargia virala per categoria. Las valurs da mesiraziun istoricas pon però vegnir consultadas vinavant sur il svilup temporal.

Infurmaziuns detagliadas davart la metoda da mesiraziun e davart la terminologia stattan a disposiziun sin la pagina d'internet da Eawag. En consequenza da novas enconuschientschas poi dar adattaziuns tar la calculaziun da las datas. Dapi il fanadur 2023 sa participeschan anc 14 sereneras al monitoring e tut las analisas vegnan fatgas dal Eawag en in labor central. Sin questa data è perquai vegnì midà il labor d'analisa per las sereneras da Basel, Region Bern, Neuchâtel, Zuchwil (Solothurn-⁠Emme), Lausanne (Vidy), Schwyz, Porrentruy (SEPE) e Luzern (Buholz), quai che reducescha la cumparegliabladad cun datas anteriuras. En il rom da la fasa transitorica hai dà ina curta interrupziun da las analisas. En cas singuls sa reducescha la cumparegliabladad cun las datas pli veglias, sche la prelevaziun da las provas e la metoda da labor vegnan adattadas. Quai pertutga la serenera da Burgdorf (adattaziun da la prelevaziun da las provas per ils 23-⁠08-⁠2022) sco er las sereneras dad Aarau, Aarburg, Appenzell (Boedeli), Baden, Bremgarten, Brugg, Hallau (Klettau), Kaisten, Lenzburg, Neuhausen am Rheinfall (Roeti), Ramsen (Bibertal-⁠Hegau), Wohlen e Zofingen (adattaziun da la metoda da labor per ils 30-⁠10-⁠2022).
La perioda giavischada po vegnir selecziunada cun il reglader sut la grafica.