COVID-⁠19 Svizra

Variantas dal virus

Il monitoring da variantas en ospitals sa concentrescha sin sequenziar il material da virus da provas da cas ospitalisads. Il sequenziament sistematic e cumplet dal genom viral (gens dal virus) pussibilitescha la cumprova da mutaziuns e l'identificaziun da variantas dal virus. A maun da las datas po vegnir stimada la cumpart da singulas variantas, che sa mussan tar grevs decurs da la malsogna, en spezial tar ospitalisaziuns. Las datas publitgadas qua sa basan sin infurmaziuns dal program naziunal da surveglianza genomica da SARS-⁠CoV-⁠2. Dal program fan part ils labors dals ospitals d'universitad ed ils pli gronds ospitals regiunals sco er labors privats tschernids e plattafurmas da sequenziament. (Program naziunal da surveglianza genomica da SARS-⁠CoV-⁠2 – rapports mensils).
La surveglianza actuala cumpiglia tut las variantas relevantas dal virus ch'èn fitg infectusas e/u che han caracteristicas immunevasivas e che influenzeschan damai la circulaziun dal virus e/u la chargia da la malsogna. La preschentaziun vegn adattada cuntinuadamain al stadi da svilup.

Il nov coronavirus (SARS-⁠CoV-⁠2) che chaschuna la malsogna transmissibla COVID-⁠19, sa transfurma cuntinuadamain tras mutaziuns en ses genom (modificaziun dals gens). Cun agid da questas mutaziuns pon vegnir determinadas e classifitgadas variantas dal virus. La gronda part da las mutaziuns han mo consequenzas minimalas u n'ha schizunt naginas consequenzas sin las caracteristicas dal virus.Intginas variantas da SARS-⁠CoV-⁠2 sa caracteriseschan tras transfurmaziuns dals agents patogens che pon influenzar la situaziun epidemiologica per exempel cun esser pli contagiusas, cun chaschunar in decurs pli grev da la malsogna u cun guntgir la resposta immunitara malgrà ina infecziun passentada u malgrà ina vaccinaziun (evasiun immunitara). Per la gronda part da las variantas dal virus enconuschentas exista, en cas d'ina vaccinaziun cumpletta, vinavant ina gronda protecziun cunter grevs decurs da la malsogna. Per singulas variantas n'èn anc betg avant maun enconuschientschas definitivas.

Expertas ed experts evalueschan regularmain las enconuschientschas las pli novas davart las variantas dal virus enconuschentas e novas e valiteschan l'influenza potenziala da las variantas dal virus en circulaziun sin la situaziun epidemiologica en Svizra ed en il Principadi da Liechtenstein. La perioda giavischada vegnir po selecziunada cun il reglader sut la grafica.